Davao City – Patay ang usa ka mag-uuma human gitigbas pasado alas-8:00 sa gabie nahitabo sa Sitio Loyan, Brgy. Tambobong, Baguio District siyudad sa Davao.
Base sa report gikan sa Baguio PNP, ang biktima giila nga si Rumolo Pandian, 34 anyos, samtang ang suspek ang iyang uyoan nga mao si Romeo Alonzo, 52 anyos, pareho nagpuyo sa maong lugar.
Sa imbestigasyon sa kapolisan migula nga ang biktima niadto sa balay sa iyang uyoan aron mag-inum kauban ang ilang mga paryente apan sa dihang papaulion na ang biktima naghuramentado ug nanghagit kini nga makig-away ngadto sa suspek.
Sa kasuko sa suspek mikuha kini og mahait nga sundang dayon tigbas sa biktima igo sa ulo ug liog hinungdan sa iyang hinanaling kamatayon.
Gidala na ang patay’ng lawas sa biktima sa Calinan Funeral Homes aron didto hayaon samtang ang suspek boluntaryong mitahan sa iyang kaugalingon ngadto sa mga nagresponde nga pulis ug nakuha ang sundang nga gibana-banaang anaa sa 24 ka pulgada ang gitas-on.
Balhug na ang suspek sa Baguio PNP ug gi-andam na ang kaso aron nga ipasaka ngadto sa korte.
RadyoMaN Don Pulayao
