Davao City – Giuyunan karon sa mga dabawenyo ang pagbakwi sa Malacañang sa amnestiyang unang gitunol sa kanhi presidente ngadto kang opposition Sen. Antonio Trillanes IV.
Usa na dinhi si Davao City Vice Mayor Bernard Al-ag diin matud pa dili kwalipikado ang senador sa amnestiya niini.
Atol sa interview sa DXDC RMN Davao sa bise alkalde, sumala niya nga karon na ang panahon nga mahatagan og tukmang silot ang senador tungod sa gihimong kudeta ug pagsamok-samok sa gobyerno.
“I think dili ni political persecution balaod ra ni siya, I think nakita nato ang Presidente nagasunod sa balaod kung unsa lang ang ginasulti sa balaod, iyang sundon and this is not politically motivated. Sa tan-aw nako ang atong gobyerno karon gihimo lang unsay tama,” segun ni Al-ag.
Sa karon, magpabilin si Trillanes sa kustodiya sa liderato sa Senado sa Pilipinas kinsa unang mibarug nga walay pag-arestong mahitabo sa magbabalaud.
Kaganina, kapin 50 ka personahe sa Criminal Investigation and Detection Group (CIDG) ug military ang nag atang sa Senate compound alang unta sa pag aresto sa senador apan wala pa kini mahitabo hangtud ning panahon sa atong pagsibya.
Ang pagbawi sa amnesty nga gitunol ngadto kang Trillanes ni kanhi Pangulong Benigno Aquino III tungod sa kasong rebelyon niini panahon sa Arroyo administration.
RadyoMaN Renz Barbarona
