Gipalugwayan sa city hall hangtud lima (5) ka buwan ang mga residenti sa housing project nga nahimutang sa relocation site sa barangay Pagatpatan ning syudad sa Butuan aron mabayran ang utang sa goberno nga niabot na ug halos duha ka tuig nga wala nabayran.
Gibutyag ni Engr. Cedrick Butao, sa city housing nga gipada-an na ug demand letter gikan sa buhatan ni Mayor Ronnievic Lagnada ang mga residenti aron impason ang mga buwan nga wala nabayri dayun mobalik sila sa tag 280 pesos nga bayad matag buwan sulod sa 15 ka tuig.
Dugang pa ni Engr. Butao nga basi sa gipirmahan nga kasabutan kaniadto nga kung mapakyas ang mga residenti sa pagbayad sa binuwan nga bayronon hayan ipatuman ang “foreclosure”.
Kahibaloan nga niadtong tuig 2011 sa panahon ni kanhi Mayor Boy Dakuy Plaza, gibalhin ang mga residenti nga nagpuyu kilid sa Agusan river padulong sa housing project sa brgy. Pagatpatan ning syudad sa Butuan.
Sa pikas bahin, nagtuo si Florefe Bonite, ang presidenti sa Home Owners Association sa brgy. Pagatpatan ning syudad sa Butuan nga dili diretsong ipatuman sa syudad ang pag-foreclose sa ilang mga housing unit kung pakyas silang makabayad sa gilugway nga lima ka buwan aron ma-impas ang mga tuig nga backlog.
Apan nanawagan si Bonite sa iyang mga kauban nga atimanon sa pagbayad ang obligasyon sa housing unit.
Sa sitwasyon sa mga residenti, maglisud gyud sa pagbayad sa 280 pesos nga binuwan nga bayronon tungod sa kalisud sa panginabuhi.
Virus-free. www.avast.com
