Bitbit ang mga plakarads diin gisulat ang ilang mga kaligutgot ug mga panawagan, mitagbo ang kapin 20 ka mga residente sa Marawi City, ngadto sa mga kongresista nga mibisita kagahapon sulod sa most affected area sa Marawi.
Tumong nila nga mapaabot ang ilang panawagan nga undangon ang ilegal nga pag-demolish sa mga balay sulod sa sector 1, nga gilangkuban sa mga barangay Daguduban ug Tolali, tungod kay wala nila kini gitugutan.
Matud pa ni Hayadola Atar, residente sa Purok 2, Barangay Daguduban, wala sila mopirma og waiver nga lakip i-demolish ang ilang mga balay tungod kay mas gusto nilang sila na ang mo-ayo niini.
Kauban ang uban pa’ng mga magbabalaod, nahidangat kagahapon sa Marawi si Batangas Congressman Geraldine Roman kinsa maoy House Committee Chair sa Disaster Management ug Anak Mindanao Party-list Representative Makmod Mending, Jr., kinsa Sub-committee chair on Marawi Rehabilitation and Reconstruction.
Tumong nila nga personal nga makit-an ang Rehabilitation and Recovery Program sa Marawi City aron ilang makit-an kung sa unsa nga paagi makatabang ang kongreso nga madali kini.
Temporaryo pa nga gi-undang sa kontraktor sa ilang debris clearing sulod sa ground zero samtang naghulat nga mogawas ang Environmental Compliance Certificate gikan sa Department of Environment and Natural Resources ug Demolition Order gikan sa mayor. (Divina M. Suson)
