Pagbutang nan Sprinkler System, lakip an pagkuha nan building permit ug zoning clearance sa lain-laing establisemento kinahanglan sundon matud nan Supervising Tourism Officer nan Surigao City
Taghatagan nan hangtud 6 ka buyan an pipila ka tag-ija sa accommodation establishments sa pagpahimutang nan sprinkler system ini agig pag-comply sa fire safety code nan Bureau of Fire Protection. Ini an nasabutan sa dihang tagpatawag an panagtigom sa lain-laing mga establisemento sa Surigao City sa pagpanguna nan Supervising Tourism Officer Roselin Merlin.
Sa Surigao City base sa record, may 12 ka mga establisemento an waya pay sprinkler system na makatabang kon masunog an building. Lakip isab an pagpanhingusog sa pagkuha sa building permit, sa listahan may laing 27 isab an waya makasunod. Gumikan sa nahilatid sa national building code, an kadagkuan sa City Eng’g. Office an naghatag nan kahigayunan sa mga negosyante nan 60 diyas sa pag-comply sa building permit ug zoning clearance.
Tagtudlo pa ni Merlin, natuki isab sa tigom an panpanhingusog sa pag-implementar sa City Ordinance na an mga resorts ug hotels na may swimming pools an magkuha nan Lifeguard na may igo na training labi na kay sa kasamtangan mga pool attendants ra an tagkuha nan mga ini. Kon dili mosunod, an posible irekomendar nan City Tourism Office na isuspende an operasyon nan ila mga swimming pools.
