Davao City – Pabor ang Philippine Amusements and Gaming Corporation (PAGCOR) nga patas-an og buhis ang petrolyo, sigarilyo ug ‘sweetened beverages’ sama sa soft drinks.
Uyon si PAGCOR Commissioner Mar Masanguid sa usbaw sa buhis sa tam-is nga ilimnon, sigarilyo ug petrolyo kay makatabang kini sa dugang panudlanan sa gobyerno pinaagi sa makolekta nga buhis gikan sa mao nga mga produkto.
Nasayod si Masanguid nga dakong epekto sa bahin sa mga kabus ang usbaw sa buhis sanglit segurado nga mag-mahal pod ang nasangpit nga mga produkto ug lagmit daghan ang dili na unya maka-afford og palit.
Apan kun mapasabot lang og maayo sa gobyerno ang katuyuan sa pagsaka sa buhis sa nasangpit nga mga produkto, hayan madawat ra kini sa katawhan, dugang sa commissioner.
Miapelar ang kanhing kapitan sa Barangay R.Castillo Agdao ngadto sa publiko nga sundon ug tumanon na lamang ang pagtaas sa buhis sa tam-is nga mga ilimnon, sigarilyo ug petrolyo sanglit balaod naman kini nga dili puwede supakon sa tanan.
Pikas bahin, suportado sab niini ang gipasar nga ordinansa sa siyudad sa Dabaw nga ilakip sa menu sa mga kan-anan ang half rice nga order.
RadyoMaN Joel Viray
