Davao City – Sagad sa mga istambay magtapok panahon sa gabii kay dinha gawasnon sila maglipay og inum hangtud mahubog na sila dinha na magsugod ang ilang bikil hangtud away.
Panahon sa kagabhion usab sagad muatake ang mga sakop sa akyat bahay, mga tulisan, riot sa mga gang, ug uban pang rason sa pagsaka sa krimen sa matag lugar sa nasud.
Gipalanog ni Marilog District Barangay Salaysay Kapitan Robert Itdang nga sakto lang ang lakang ni Pangulong Rodrigo Duterte nga pandakpon ang mga istambay diyes oras sa kagabhion.
Magkunhod ang krimen sa kabarangayan kung hiposon sa mga otoridad ang mga istambay kansang hinungdan sa pagtugaw sa kalinaw sa kabarangayan nunot sa kasamok nga mugnaon sa mga tambay.
Busa sakto lang daw ang kamandoan ni Pangulong Rodrigo Duterte nga sikopon ang mga tambay nga dili mahilig matulog bisan og diyes oras na sa kagabhion ug kadlawon na.
Dili kumbinsido si Itdang nga malapas ang katungod sa mga istambay tungod dakpon sila sa mga otoridad nga nagtinguha lang og kalinaw aron luwas ang mga tawo gikan sa mga kawatan, mga tulisan, ug akyat-bahay gang.
RadyoMaN Joel Viray
