PALO, LEYTE – Nag ika-duha an Eastern Visayas ha bug-os nga nasod nga may pinakahataas nga porsyento hin live-in arrangement o an gintatawag nga early marriages ha mga kabataan nga nag eedad 17 pa-ubos basi ha Young Adult and Fertility survey.
Sumala kan Melanie Albertos, Assistant Regional Director han Commission on Population Region 8, usa nga challenge ha ira buhatan ngan ha mga tagsa-tagsa nga mga Local Government Units an pagsurapo ha mao nga kahimtang.
Ha ginbuhat nga research study han POPCOM ngan University of the Philippines Tacloban durante han mga rason kun kay ano nag ika-duha an Eastern Visayas ha may pinakahataas nga porsyento han live-in arrangement, an kag-anak an gumawas nga syahan nga rason ngan nag i-kaduha an kultura.
Sumala naman kan Reyan Arinto, Public Information Officer III han POPCOM, unom nga hospital dinhi ha Rehiyon otso an nag-iimplementar hin programa para ha mga young parents kun diin hira in gin-tututduan ha responsible parenting and family planning, home management ngan life skills.
Labot la ha mao nga programa, mas gin-papakusog pa han POPCOM an ira information, educational communication campaigns para ipahibaro ha mga batan-on an mga resulta kun hira in mag-aasawa ha sayo nga panahon.
