TACLOBAN CITY – Ginkaka-alarma yana han Department Of Environment and Natural Resources (DENR) Regional Office 8 an sintomas han polusyon ha Cuatro Islas dinhi ha Leyte.
Ha report han DENR, klaro na an polusyon ha nasabi nga mga Islas tungod han pagdamo han nangungukoy.
An upat nga Isla amu an Apid, Mahaba, Digyo ha bungto han Inopacan ngan Himokilan naman ha bungto han Hindang.
Mas pinakadamo an nangungukoy nga tawo ha 48 ka-ektarya nga Himokilan Island nga mayada 200 nga pamilya.
Mayada 2,138 nga indibidwal an nangungukoy ha upat nga isla nga igindeklara nga Marine Protected Areas tungod han Presidential Proclamation No. 270 dida han Abril 13, tuig 2000.
Ha paglibot-libot han mga tinaglawas han DENR, nakit-an nira an problema sugad han presensya han komunidad, pagdamo han turista, paghapil hin mga basura bis la diin ngan magkadurudilain nga poor waste management.
Mas nagtikadamo an mga turista matapos an mas ginpakusog nga promotion ngan tourism activities.
Sumala han DENR, kinahanglan may buhaton an mga gintutu-inan nga ahensya para maprotektaran an Cuatro Islas ngan diri mapareho ha Boracay.
Dugang han DENR, may mga istraktura an mao nga isla nga kinahanglan ig-demolish.
Ginlunsar na gihapon han DENR an “Protect Cuatro Islas” campaign para mahibaro ngan maintidihan an importansya han kalimpyo han ecotourism area.
