Roxas City, Capiz- Nag-ani sang nagkatuhay nga mga reaksyon gikan sa publiko partikular sa mga netizens ang nangin proposal ni Senator-elect Francis Tolentino nga dugangan sang isa pa ka bituon ang subong nga tatlo a bituon sang bandila sang Pilipinas.
Suno sa iya mensahe sa selebrasyon sang ika-121 nga anibersaryo sang Araw ng Kalayaan sa Davao City bilang dinapit nga bisita, luyag niya nga dugangan ang bituon sa bandila para sa Benham Rise.
“I propose a fourth star to the Philippine flag. A fourth star to reflect the Benham Rise, the future Philippines, the future land of the next generation of Filipinos,”.
Samtang reaksyon naman sang pila ka mga eksperto, kun madayon ang amo nga proposal masamad lamang ang konteksto sang kasaysayan sang bandila sang Pilipinas.
Luyag man ni Tolentino nga i-selebrar ang bag-o nga kahilwayan sa Pilipinas. Kalakip na diri ang kahilwayan kontra sa ilegal nga droga, kaimulon, kurapsyon, krimen kag ang kahilwayan sa pagproteher sa palibot.
Madumdoman nga ang nakaligad nga tuig, ginrekomendar man sa Senado ang hagna nga magbutang sang ika-9 nga sinag sang adlaw sa bandila sang Pilipinas bilang pagkilala sa kabaganihan sang mga kautoran nga Muslim.
