Davao City – Wala na masalba pa sa Panacan Fire Station ang balay sa pamilyang Arellano ug na-ugdaw gayod kini gumikan sa kapaspas sa pagkuyanap sa kalayo sa tibuok panimalay.
Walay nadala nga mga gamit ang maong pamilya human naapil og kasunog sa ilang balay nga gipanag-iyahan ni Grace Arellano sa may Kilometer 12, Sasa, ning siyudad.
Sa nasangpit nga insidente, usa ka Adrian Cabales ang napaso ug angol human gisuway og salba ang inutang nga motor nga naapil usab og ka-ugdaw.
Subay sa imbestigasyon ni SFO1 Romelo Credo nga nagsugod matud pa ang pag-ulbo sa kalayo sa kwarto ni Adrian alas-7:30 gahapon sa buntag.
Ang pagdula og posporo sa tulo ka bata ibabaw sa kutson nga higdaanan ni Adrian ang gitudlong hinungdan sa sunog nga midamyos og P300,000.
Gialalayan na sa City Social Services and Development Office (CSSDO) ang tulo ka mga bata alang sa kustodiya.
RadyoMaN Joel Viray
