CAPIZ – Nagpungko na ang bag-o nga tagpamuno sang DepEd Capiz kag Roxas City Division sang tinalikdan nga Hulyo 20. Ini matapos guinpatuman sang DepEd ang nakaandan nga pagbalasa sang mga division superintendents sa rehiyon 6.
Guinsaksihan ni Ms. Melanie Arancillo nga nagserbi nga tiglawas ni Governor Tony ang send-off program para kay Dr. Miguel Mac Aposin CESO V nga nagpangalagad bilang Division Superintendent sang Capiz sa masobra 3 ka tuig.
Guinpalab-ot sini ang pagpanginbulahan kay Aposin sa iya maayo nga pagdumala sa ahensya kag ang pagpasalamat sa dako nga bulig sa gobierno probinsyal sa pagpatuman sang mga programa agud mapaumwad ang kalidad sang edukasyon sa Capiz.
Si Dr. Aposin ang nagapungko na sa karon bilang Division Superintendent sa probinsya sang Iloilo. Samtang ang guinbiyaan sini nga posisyon ang guin-asyumar ni Dr. Roel Bermejo CESO V kag anay Roxas City Division Supt.
Ang anay Asst. Schools Div.Supt naman sang Iloilo nga si Dr. Feliza Beriong ang nagtal-os sa guinbiyaan nga posisyon ni Bermejo. Nagalaum ang gobernador nga magapadayon ang pag-ayo sang edukasyon sa Capiz sa pagdumala sang mga bag-o nga lideres sang City kag Capiz Division.
(Photo from Google Maps)
(c) Caoiz Aksyon News Center
