Davao City – Gumikan sa kaadik sa mga kabataan karon sa online games ug social media daghan kanila naapektuhan ang pagtuon apan ang natun-an mao ang kabastosan tungod sa impluwensya hatud ani sa mga bata.
Mao ng alang kang Janeth Anima, Registrar sa Koinonia Theological Seminary Foundation Incorporation, importante kaayo dunay rules ipahamtang sa mga anak sa paggamit og cellphone ug social media.
Sigun ni Anima, kung makasupak ang iyang mga anak sa rules and regulations usa ka semana imbargohan og gadgets ug dili usab pwede mugamit sa social media ni makadula og online games.
Matud ni Anima, kung dili niya butangan og pamalaod ang pagdula sa online games ug pila ka oras mag-babad sa social media makaapekto kini sa ilang pagtuon ug pagtungha butang nga dili niya matugutan.
“Dapat maging aware sila na di maayo ang paggamit permanente ug oras-oras tungod ana ug usahay ang mga bata karon kun dili nimo tagaan og boundary, sa panimalay daan tagaan sila og disiplina ug tagaan sila og mga rules aron masayod sila sa dili maayo nga epekto sa online games ug social media,” sulti ni Anima
Gibutyag ni Anima, alarming na kaayo ang pagdagsa sa mga kabataan nga na-ungo sa online games sama sa Dota ug sa social media.
Gipasabot ni Anima, ang sobra ka expose sa online games ug ang social media maghatud kini sa indikasyon nga pagka-criminal instinct.
Samtang gibutyag ni Argel Almonte sa Koinonia Theological Seminary Foundation Incorporated nga dunay dala nga risgo sa kaugmaon sa mga kabataan ang online games ug ang social media.
Giingon ni Almonte, ang wala lang daw mahibaloi sa mga kabataan nga hinay-hinay na sila gilamoy sa dili maayo nga impluwensiya sa online games ug social media.
Ug sagad sa implikasyon mao ang pagkawala og gana sa oras sa tingkaon, pagbarkada, pagkawalay gana sa pagtuon, paglulinghayaw, paghimo og krimen, pagkadaot sa lawas tungod sa radiation.
Nasuta sa pagtoon nga ang mga adik sa online games dali ra madaot ang lawas tungod sa radiation nga anaa sa mga gadgets ug wala sa’y focus ang mga kabataan nga nagbabad sa pagdula sa dota sa online.
Busa awhag niya sa mga ginikanan, dili pasagdan ang ilang mga anak sa pagdula sa online games ug sa social media aron makontrol ang ilang paggahin og panahon niana nga butanga.
RadyoMaN Joel Viray
