[Ladawan ni Jheboy Jamorabon]
iFM Laoag – Nauram ti maysa a van iti maysa a paggasolinaan iti Brgy. Lanao Bangui, Ilocos Norte idi kalman Disiembre 22, 2019.
Nabigbig ti lugan nga MB 100 model 97 nga addaan ti plate number nga UPZ133 nga inturong ni Mr. Marlon Torrado y Ganno, agtawen uppat a pulo (40 y/o), naasawaan, residente iti Brgy. Ligaya iti ili ti Pagudpud.
Segun ti inisial nga imbestigasion ti Bureau of Fire Protection ken Philippine National Police, Bangui, nagturong ni Torrado iti gasolinaan particular iti LGE Shell Gasoline Station nga agpakarga kuma ti gas iti van ngem apaman a nakapila daytoy iti batangna a makargaan ket nasiim ti maysa a gasoline boy a ni Mr. Anthony Santos, agtawen tallupulo (30 y/o) , awanan ti asawa, ken taga Brgy. Kalaw Dumalneg, Ilocos Norte nga adda iti agasasok a parte ti lugan.
Rumrumwar nga electrical wiring iti puon ken gapu nu apay nagasok iti hood ti van a nangitunda ti dagusna a naggil-ayaban ken rason ti pannakauramna a sibubukel kasta pay a nairaman pay iti maysa a refilling unit ti diesel gas a kaabayna.
Nagbalin met a naridam dagiti tattao iti lugar a nangusar ti fire extinguisher a nangiddep iti apoy ken saan met a naan ano iti akin lugan.
Agpapan ita a gundaway ket saan pay a nadeterminar nu mano iti kabuklan a balor dagiti nadadael iti daytoy nga uram. (Joe Anne Agustin, RMN News)
