ILOILO CITY – Ginakwestyon ni city councilor Joshua Alim ang pagguba sang bahin sang bike lane sa diversion road agud hatagan sang alagyan ang traffic lights kag connecting road gikan sa Iloilo city center padulong sang Atria.
Sa iya privilege speech sa session sang city council ginkwestyon ni Alim ang management sang Gaisano city center sa pagguba sang bikelane nga gingastuhan sang gobyerno sang minilyon ka pesos.
Nagakahangawa si Alim nga kun may iban man nga magpatindog sang structures sa diversion road, magasunod man sa ginhimo sang Gaisano nga gub-on ang bike lane.
Bilang sabat ginpahayag ni Mr. Halley Alcarde , Assistant Vice President kag head sang Sales and Marketing sang Iloilo City Center- Gaisano Capital Group aprobado sang Department of Public Works and Highways (DPWH) 6 ang ila proyekto.
Pahayag ni alkalde nga may budget nga P5 million ang traffic signalization porject samtang ang construction sang jeepney bay kag improvement sang bike lane nga nagasanga sa main entrance sang Gaisano city center nagabalor sang P3 million.
Nagpasalig si Alcarde nga paayuhon kag ibalik nila sa husto nga sitwasyon ang bikelane.
