Davao City – Nagmalinawon ang paghinumdom sa mga minatay kini human walay krimen na-monitor ang Task Force Davao sa mga sam-ang sa tibuok sa syudad gahapong adlawa.
Subay sa inisyal nga assessment ni TF Davao Spokesperson Lt.Col.Randolph Cabangbang miingon kini nga generally peaceful ang pagduaw sa mga kabanay sa ilang mga minahal sa kinabuhi sa mga sementeryo palibot sa dakbayan sa Dabaw.
Dugang niini nga kung aduna ma’y gipangdakop ang mga otoridad kadto lamang mga tawo nga nakasupak sa mga ordinansa sama sa anti-smoking ordinance ug pagkumpiska sa mga butang nga hugot gidili sud sa sementeryo.
Suma ni Cabangbang nga ang pagpatuman og sakto sa security plan ug pagkatag sa daghang ginsakpan sa kapulisan ug Task Force Davao ug force multipliers sa mga sam-ang hinungdan sa pagkab-ot sa malinawon ug hapsay nga kalag-kalag karong tuiga.
Mialma matud pa ang pipila ka pasahero sa istriktong gipatuman nga checkpoints apan sa kinatibuk-an daghan gihapon ang naka-sabot ug midawat sa gipatumang lig-on nga seguridad pagawas ug pasulod sa mga sam-ang ug sa siyudad sa Dabaw.
Dili pa makasulti si Cabangbang kung kanus-a mapull-out ang ilang mga ginsakpan gikan sa mga sam-ang kay hangtud aduna pay mga tawo ang mga sementeryo magpabilin gihapon ang ilang pwersa aron bantayan ang mga muhabol pa sa Undas.
RadyoMaN Joel Viray
