TACLOBAN CITY – Iginkakabaraka han Dept. Of Health o kun DOH Region 8 an paglobo han mga biktima han Human Immunodeficiency Virus o kun HIV dinhi ha aton dapit kun diin number 8 spot kita ha Top 10 ha bug-os nga Pilipinas nga damo iton mga infected han mao nga virus.
Ha Tacloban City naitala an pinakadamo nga biktima hini.
Sanglit an usa nga mga solusyon han mao nga buhatan, manhatag hin condom.
Pero sumala kan Boyd Roderick Cerro, namamangulo han DOH-8 Regional Epidemiology and Survielance Onit, diri karuyag sidngon nga an panhatag nira hin condom hin mag aghat hin paghilawasay.
“Iton amon paghatag hin condom diri pareho hiton pagahatag hin candy, syempre mayada anay advocacy campaign nga ginhihimo. Gintututduan naton kun ano it gamit hit condom kay bangin gumamit hira ini tapos diri ngayan amu an ira paggamit.”
Sumala han mao nga opisyal, kasagaran nga naapektuhan han virus an mga millenials amu nga iginkakabara ini.
Nagdudumara hira yana hin advocacy campaign para maimpormaran an molupyo han kadako nga bulig han paggamit han condom.
Pahinumdom han DOH, makipaghilawasay ha uusa la nga partner, kun diri mahimo nga maging faithful, gumamit hin condom.
