Davao City – Aduna nay gipasa nga resolusyon sa paghatag og booster shots sa mga healthcare workers nga nagtrabaho sulod sa ospital human nga aduna usay mga medical frontliners nga nagpositibo sa Coronavirus Disease 2019 (COVID-19).
Matud ni Davao City Mayor Sara Duterte-Carpio (sa interbyu sa city-owned radio) nga kini ang nahimong lakang sa Davao City COVID-19 Task Force (TF) tungod sa mga natalang nagpositibong health workers labi na mga pribadong ospital diin ang uban gipailawom sa quarantine.
Sa pagkakaron ginapaabot na lamang ang tubag sa Department of Health (DOH)-XI sa maong resolusyon nga pormal nga gipaabot sa departamento kagahapong adlawa (September 20, 2021).
“We already passed a resolution requesting the Region XI office of the DOH to allow the rollout of booster shots for all healthcare workers working inside hospitals,” sulti sa mayor.
Una na nga gibutyag sa National Task Force (NTF) COVID-19 nga posibleng sugdan sa Oktubre o sa Nobyembre ang booster shots alang sa mga medical workers ug gipanigurong adunay igong suplay sa bakuna alang niini.
RadyoMaN Kirby Manzon
