Roxas City, Capiz – Bangud sang paghigugma, gin-antos ni Toto ang pagsakit sa iya sang iya karelasyon nga isa ka GRO nga si Nene. Nag-angkon sang samad sa ulo kag mga lagub sa lawas si Toto matapos ginsakit ni Nene. Ginlampusan ini sang bato sa ulo nga amo ang gintunaan sang pagkapilas sini.
Apisar sang kasakitan nga naagum ni Toto wala gid ini nagbalos ukon nagbato sa babaye bangud sang iya himpit nga paghigugma. Nahibaluan nga si Toto ang may asawa nga nagatrabaho sa luwas sang pungsod, apang bangud sang kahidlaw, ini ang rasun sang iya pagpadulong sa mga bar. Nakilala sini si Nene nga amo ang nagahatag sa iya sang pinasahi nga kalipay nga nagdugay sang mga apat ka bulan.
Wala magustuhan ni Toto ang pag-upod ni Nene sa iban nga customer rasun nga ginkompronta sini ang babaye, apang hinali lamang ini naakig sa wala nahibaluan nga rason kag ginsakit ang mapainubuson nga si Toto.
Sa bahin naman ni Nene, ginpahayag sini nga wala sang espesyal nga relasyon nga nagapatunga sa ila ni Toto, gani wala ini sang kinamatarong nga magpangimon kag dumilian siya nga mag-upod sa iban nga lalaki, ilabi na sa mga customer. Nahibaluan nga si Toto ang nagapang-edaron sang 51-anyos kag isa ka foreman.
Kon kamo sa lugar ni Toto, anu ang pagahimuon ninyo? Anu ang mahatag ninyo nga panugyan kay Toto?
(Photo credit: CERT)
