Gi-awhag karon sa konseho sa barangay Linangkayan, sa Naawan, Misamis Oriental ang probinsiyal nga kagamhanan nga ma-imbestigahan ang kontraktor nga nagtrabaho sa usa ka covered gym sa elementary school sa maong barangay.
Kini tungod kay, matud pa ni Kapitan Ramon Leotero, buot nilang malikayan ang lain pang disgrasya nga aduna nay nga bata nga maapil.
Niadtong Biyernes, nakurat ang mga magtutudlo ug mga bata sa Linangkayan Elementary School sa kalit nga pagkahugno sa atop sa gym niini nga kamulong gitrabaho sa Dy Construction.
Duha ka mga trabahante ang nahulog kauban sa maong pagkahugno… Ang usa nabali ang batiis samtang ang usa nakaangkon lang og mga pangos sa kalawan. Nakagawas ra usab sila dayun human matambalan sa tambalanan sa silingang lungsod sa Manticao.
Suwerte nga walay mga bata nga nadamay tungod kay nahitabo ang maong insidente, pipila ka minutos human namalik ang mga bata sa ilang mga classroom gikan nag-recess.
Matud pa sa magtutudlo nga si Lorry Dandasan, di mo-ubos sa 20 ka mga bata, kasagaran kindergarten ug grade 1, ang magdula sa maong gym matag recess o kaha lunch break.
Tungod niini, miingon si Linangkayan Barangay Chairman Ramon Leotero nga awhagon niya ang probinsiyal nga kagamhanan sa Misamis Oriental nga imbestigahan ang kontraktor.
Si Dr. Ric Gabe, ang Public Schools District Supervisor sa Naawan, miingon nga dapiton nila ang kontraktor alang sa usa ka dayalogo ngadto sa barangay.
Ang maong pasilidad, nga nagkantidad og 2.3 milyones pesos, gipondogan pinaagi sa Special Education Funds sa probinsiyal nga kagamhanan sa Misamis Oriental.
Gisugdan kini niadtong Hulyo sa nakalabay’ng tuig ug gitakda untang matapos karong bulana.
Kamulo’ng tiwas og taod sa atop ug girder ang mga trabahante dihang nahugno kini.
