Davao City- Paimbestigahan sa mga ginikanan ang pagkalumos patay sa ilang anak kinsa nakaplagan nga wala na’y kinabuhi ug naglutaw na sa Davao River kaganinang buntag.
Sa interbyu sa DXDC RMN NEWS TEAM, gikanayon ni Delia Anastacio inahan sa 8 anyos nga bata nga si Christian nga buot nilang masayran ang kamatuoran sa pagkalumos patay sa ilang anak.
Matud sa amahan nga si Edelberto Anastacio, gikuyog ang biktima sa iyang mga ig-agaw nga pulos mga menor de edad sa Davao River aron tudluan og salom niadtong miaging adlaw.
Dugay matud pa nasugilon sa mga ig-agaw ngadto sa mga ginikanan ni Christian nga nalumos na diay ang biktima. Sa Bolton area na nakita sa Urban Search and Rescue Team sa Central 911 ang lawas sa biktima ug gikumpirma sa mag-asawa nga ilang anak ang nakaplagan.
Milutaw sa inisyal nga imbestisgasyon sa Homicide and Arson sa Talomo PNP nga milukso si Christian sa Davao River uban sa iyang mga ig-agaw apan wala na kini nakatungha pa.
Sa karon, gihaya na sa ilang panimalay sa may Purok 2, New Matina Gravahan ang biktima.
Kasamang Paul Canono
