Sa interbyu sa DXDC RMN Davao kang Police Major Randy Galicia, Chief of Police sa Cateel MPS, gisaysay niini nga ang biktima mao ang na-missing nga bata niadtong Abril 1, 2023, samtang sila nanabok sa sapa sakay sa gamay’ng bangka kauban sa iyang 6 ka classmates ug 1 ka kababata, pulos mga menor de edad.
Nasayrang tungod sa kapuno sa bangka, nasudlan kini og tubig ug didto na nag-iyahay ang nahisgutan og salbar sa ilang kaugalingon apan pakyas nga naluwas ang biktima.
“Paminaw man gud nila nakaon sya sa ilalom. Basin napundo sa ilalom ba sa mga lugot. Then, pag-bloat na sa lawas sa pila ka days didto na sya milutaw,” sulti sa pulis.
Usa ka Jimmy Arado, residente sa lugar ang mitabok sa maong sapa kagahapon, Abril 4, 2023 ug didto nakita niini ang patay’ng lawas nga naglutaw. Iyaha gilayon nga gihiktan ang tiil niini sa kilid sa dam aron dili maanod sa tubig ug gireport sa awtoridad ang insidente.
Gilayon usab nga gidala sa Davao Oriental Provincial Hospital-Cateel ang lawas sa biktima ug nasayrang ‘acute respiratory failure, secondary to drowning’ ang gikamatyan sa menor de edad.
RadyoMaN Kirby Manzon
