Davao City – Sangko sa langit ang gibating kasuko sa mismong kabanay ni Randy Cadiente kinsa gi-akusahan nga nagsunog patay sa kaugalingong anak nga si alyas Inday sa miaging buwan.
Dili madawat sa amahan ug sa mga igsoon nga nakaako si Randy sa pagsunog-patay sa iyang anak butang nga hugot gilimod sa nahisgutan.
Ug posible mao kini ang rason ngano wala duawa si Randy sulod sa selda sa Sasa PNP aron susihon ang iyang kahimtang human gikasuhan og parricide.
Matud sa bayaw nga si Tata nga wala na batia og kaluoy ang mga igsoon ni Randy kaniya ug gani wala na silay plano kuhaon ang patay’ng lawas nga anaa sa morgue sa Southern Philippines Medical Center (SPMC) ug bahala na ang gobyerno magpalubong kaniya.
Naghikog-patay si Randy gamit ang bandage ug giparok ang ulo og pila ka higayon sa pader sa CR sa selda sa presinto 4 gahapon sa kadlawon busa dead on arrival kini sa SPMC.
Duha na kahigayon misuway og pakamatay si Randy apan sa ikatulong higayon nahitabo gayod ang iyang dautang plano sa dihang nakalugar kini.
Una niini, kanunay na matud pa nagsulti si Randy nga sa dili madugay magkita na sila sa iyang anak nga si alyas Inday didto sa langit.
Nagtoo si Police Chief Inspector Emerson Pugong, hepe sa Sasa PNP, nga posible na-depress si Randy gumikan sa nahitabo sa iyang anak ug ang pagsalikway kaniya sa iyang pamilya mismo.
Si Dr. Faith Prieto kinsa usa ka registered nurse, nagsulti nga dakong kontribusyon sa depression sa tawo ang emosyonal nga suliran nunot sa pagsambog sa lahi-lahi nga problema sa kinabuhi.
Giingon ni Prieto, ang pag-suicide ni Randy ug paglukso-patay sa mall sa usa ka ginang sa kauluhan mga ebidensiya nga sila pareho naghambin sa sakit nga depression gumikan sa epekto sa mga suliran.
Sanglit ang depression nagpanukad man sa emosyonal nga aspeto makatabang og dako sa pakigbatok sa mao nga sakit ang pagmaymay sa ubang tawo hilabi na sa mismong pamilya.
Busa tambag ni Prieto ngadto sa mga tawo nga nagtipig og mga suliran nga ipabuhagay sa mga kasaligan ang mga problema aron dili musangko sa depression ug aron malikayan ang pag-suicide.
RadyoMaN Joel Viray
