Gipa-imbestigahan na sa Lanao del Sur Task Force COVID-19 ang sumbong nga adunay mga pamilya nga nagpa-photocopy sa ilang home quarantine pass aron aduna silay kapin sa usa niini matag pamilya o panimalay.
Nagpasabot nga kapin usa ang makagawas sa balay aron moadto sa kung asa siya gusto mo-adto, bisan pa man sa gipatumang enhanced community quarantine sa Marawi City ug sa tibook probinsiya sa Lanao del Sur.
Sa gipahugtang community quarantine, gihatagan og tag-usa ka quarantine pass ang matag pamilya o panimalay aron usa ka tawo lang ang mogawas aron mopalit og pagkaon o tambal o kaha mokuyog sa adunay sakit nga magpatambal.
Tumong niini aron malimitahan ang lihok sa mga tawo ug malikayan ang pagkuyanap sa virus.
Matud pa ni Zia Alonto Adiong, tigpamaba sa TF COVID sa Lanao del Sur, gimando na usab ngadto sa mga mayor sa munisipyo, lakip na sa Marawi ang pagpa-imbestiga niini.
Aduna na usay mga surviellance units ang 103rd Infantry Brigade, Philippine Army aron sugdan ang pag-lockdown, ilabina sa Lake Lanao nga giingong maoy gihimong dalan sa mga gustong mosibat paingon sa ubang dapit.
Gipahugtan na usab ang pagbantay sa mga mass gatherings nga giingong aduna pay nagbuhat niini taliwala sa kamandoan nga gibawal pa kini karong mga panahona tungod kay daghan ang dili maka-obserba sa social distancing. (Divina M. Suson, Marawi City, March 23)
