Sa interview sa DXDC kang Lhing Gementiza, kabanay ni R-jay, gisaysay niini nga mi-rescue lang ang lalaki tungod barkada niya ang mga biktima apan tungod kay naggunit kini og sundang, naalaan kini’g suspect ug napusilan. Gani alang sa ilang pamilya, lisod alang kanila ang pagsinggit og hustisya tungod pulis matud pa ang makalaban nila.
“Dili ko katulog sa nahitabo kang R-jay, nitabang ra man siya, nitabang ra. Kabalo man gyud mi nga lisod kuhaon ang hustisya kay pulis man ang among makalaban. Pero unta maklaro lang sa side nga dili siya ang dautan kay naay mga post nga nag-focus nga napatay daw sa pulis ang suspect which is naapil siya didto nga statement kay upat baya sila namatay. Gusto namo nga dili mahan-ok sa iyaha ug di mabuhatan og storya kay maayo baya na si R-jay,” saysay pa ni Lhing.
Samtang sa opisyal usab nga report sa kapulisan, nasugatan matud pa sa usa ka pulis si R-jay nga adunay dalang sundang nga midasmag kaniya hinungdan nga gipusil kini sa tiil apan nakabsan ra gihapon sa kinabuhi pag abot sa balay tambalanan. Subay niini, gisulti ni Gementiza nga tubagon sa kapulisan ang tanang galastuhon sa pagpahiluna sa lalaki.
Sa karon usab, maglusad og imbestigasyon ang Regional Internal Affairs Service (RIAS) XI kalabot sa insidente.
RadyoMaN Ivy Parido
