Subay na sa umaabot nga paghandum sa ika “120th Independence Day” karong umaabot Hunyo 12, ning tuiga, naga-awhag na usab karon ang kagamhanang lokal ning dakbayan pinaagi ni City Mayor Darel Dexter T. Uy, ang pagpakayab sa atong nasudnong bandila dinha sa tanang mga pampublikong buhatan ug ahensiya, tulunghaan, mga pribadong establismento, residensiya, lakip na ang tanang mga sakyanan (ma-pampubliko o pribado), gikan sa Mayo 28 ngadto na sa Hunyo 12, ning tuiga.
Kining maong pag-awhag ang gipanawagan alang sa tanang mga Dipolognon, isip pagsanong ngadto sa nahalagda sa Akta Republika no. 8491 o nailang “FLAG AND HERALDIC CODE OF THE PHILIPPINES” sa atong nasud.
Sumala pa, nga sigun sa nahalagda sa seksiyon 7 ning maong akta republika, gimando niini ang pagpakayab sa atong nasudnong bandila dinha sa mga pampubliko ug pribadong mga edipisyo, lakip na ang mga kabalayan atol sa mga talagsaon ug makasaysayanong petsa sama sa Abril 9 (Araw nga kagitingan), Mayo 1 (Labor Day), Mayo 28 (Flag Day), Hunyo 12 (Independence Day), katapusang Domingo sa Agosto (National Heroes Day), Nobyembre 30 ( Andres Bonifacio Day) ug Disyembre 30 (Rizal Day).
Samtang sa seksiyon 26 usab niini, gimando usab ang pagpakayab sa atong nasudnong bandila gikan sa Mayo 28 ngadto na sa Hunyo 12, gumikan kay ang Mayo 28 mao ang giilang “National Flag Day” , samtang ang Hunyo 12 usab, mao ang atong adlaw sa ka-ugalingnan (Independence day).
Subay ning maong okasyon, kinasing-kasing karong naga-awhag ang liderato ning atong dakbayan ngadto sa tanan sa pagsanong ning maong balaodnon, isip usa ka mabuot nga lungsoranon, ug sa pagpakita usab sa atong patriyotismo sa atong nasud, isip mga Filipino.(CIO-alb)
