Davao City – Nabalaka ang Committee on Health sa Davao City Council sa pagpamaligya sa mga items gikan sa sulod sa nasunog nga NCCC Mall Davao.
Sumala sa chairman sa nasangpit sa maong komitiba nga si Councilor Joselle Villafuerte atol sa interview sa Serbisyong Straight to the Point sa DXDC RMN Davao, dili maayo alang sa panglawas ang mga gamit ilabi na ang mga pagkaon ug ilimnon nga gikan sa nasunog nga estbalisemento.
Sumala ni Villafuerte nga atol sa sunog, adunay mga nahitabong chemical reactions sa mga botelya, mga lata sa ubang pagkaon nga dili luwas nga kaunon sa mga tawo ingon man sa mga giamumang hayop.
Kahinumduman nga mikalat sa social media ang mga items gikan sa NCCC Mall niadtong June 20, 2018 nga gibaligya sa may Purok 9, Brgy. Tacunan, Tugbok Dist. Davao City.
Hinuon, giingon ni Davao City Police Office kun DCPO nga gipasarado sa Tugbok Police Station ang pagpamaligya diin giila ang tag-iya sa luna nga si Benjardi Bermudo kinsa matud pa gi-hire sa NCCC Mall aron i-demolish ang nasangit nga mall sa Matina.
Subay niini, maghimo og formal report ang konseho atol sa regular session sa city council ug muhimo og aksyon nga matawag ang atensyon sa mga nalakip ani nga mulo ngadto sa committee hearing ug sigurohong dili na mausab pa ang maong insidente.
RadyoMaN Renz Barbarona
