General Santos City–Away sa yuta ang usa sa mga gitutukan nga angulo karon sa kapuilisan nga sakop sa Police Station 3 kabahin sa lain na usab nga pag pamusil patay ilawom sa ilang area of responsibility kung asa biktima ang usa ka Anabelle Marioles Diente, 32 anyos usa ka trabahante sa saloon ug nanimuyo sa Prk 5, Barangay Ligaya ning syudad sa Gensan.
Sumala pa ni PCI Peter Pinalgan Jr. , ang hepe sa Police Station 3 nga basi sa ilang gihimong pagsuta sa lugar ug pakighinabi sa live-in partner sa biktima mibutyag kini nga posibleng away sa yuta ang maoy hinungdan sa maong pag pusil tungod kay wala na matud pay laing posibleng hinungdan nganong patyon kini.
Kung kahinumduman nga gipusil sa wala mailhing responsible ang biktima samtang na lingkod kini sa tindahan nga nahimutang sa ilang lugar alas 12:00 pasado ang takna sa udto.
Gibutyag hinuon ni PCI Pinalgan nga sa kasamtangan aduna naman silay ginakonsidera nga person of interest kabahin na sa kamatayon sa biktima.
Migula matud pa sa ilang imbistigasyon nga kanhi nang nakadawat ug bahad sa kinabuhi ang biktima lakip na ang iyang live in partner nga si Jun-Jun tungod sa usa ka bakanteng luna sa ilang lugar. (Dave Silagan)
