Davao City- Nagdeklara na og full alert status ang Davao City Police Office para sa ikasang mga lihok protesta sa mga progresibong pundok sa ika-46th nga kasumaran sa deklarasyon sa balaod militar ni Presidente Ferdinand Marcos.
Gibatbat ni DCPO Director Senior Superintendent Alexander Tagum nga hugtanon gayod nilang ipatuman ang balaod kung aduna may mamatikdang bayolasyon atol sa mga aktibidad sa mga raliyista.
“I would like to take this opportunity nga warningan ang atong mga katawhan dili lang sa Davao City kon dili sa palibot nga region nga dili na magpailad sa mga komunistang grupo nga nagaplano nga manghakot og mga raliyista kuno kay ang purpose nila manggubot na pod sa atong syudad. Dili na ta magpa-uto ana nila kay mandaot lang na sila sa atong gobyerno,” sumala ni Tagum.
Gisaad ni Tagum nga ilang iobserba ang maximum tolerance sa himuong aktibidad apan dili usab sila magpanukong arestuhon ug kasuhan ang mga salawayon ilabina kung mangdabdab kini’g mga effigies.
“Definitely kung manunog na pod na sila, dakpon nato ug file-an nato og kaso. Kabalo man sila nga naay balaod nga bawal magsunog because we have Clean Air Act and they should follow the law,” matud ni Tagum
Samtang gitin-aw ni Task Force Davao Commander Col. Nolasco Mempin nga ang hugot nga inspeksyon sa matag checkpoints gipatuman kini sa tanang musulod nga behikulo ug mga tao sa syudad ug dili aron madelatar ang mga pag-entra sa mga musalmot sa mga lihok protesta dinhi sa lungsod.
“Kasi mga previous allegations nila dine-delay natin tayo taman dito sa checkpoints sinusunod lang natin ang proseso considering na nandoon pa rin iyong mga threats natin kaya mahigpit ang ating security sa mga checkpoint areas natin,” segun ni Mempin.
Lauman nga anaa sa 500 ka mga protesters ang musalmot sa lihok protesta atol sa martial law anniversary.
RadyoMaN Aimee Guinita
