Sigma, Capiz- Lunsay nag-angkon sang kapilasan sa lawas ang duha ka mga persona sa Brgy. Guintas sa banwa sang Sigma makaligad ang mga ini ang nagbun-anay kag naglab-anay alas 3:30 sang hapon.
Ginkilala ang biktima kay Agustin Martinez Jr. y Aliverio, 34-anyos nga nga nag-angkon sang pilas sa tuo nga kamot kag dughan matapos nga ginlabo sang suspek nga si Johnny Geronimo y Campoy, 38-anyos nga residente man sang nasambitan nga lugar.
Suno sa imbestigasyon sang mga kapulisan, kahulogbon kag pagpangimon ang ginatudlo nga kabangdanan sang krimen.
Base sa blotter report sang Sigma PNP, ginkadtoan sang hubog nga biktima nga si Martinez ang iya nga asawa nga si Emelyn Martinez nga nagagarab kaupod ang suspek.
Bitbit sini ang isa ka kutsilyo kag ginhangkat sang away ang suspek kabangdanan nga gindala sang asawa ang bana sini sa ila poluy-an para nga pakalmahon apang makaligad ang pila ka minutos, liwat nga nagbalik sa lugar ang biktima kag didto naman nagsinggitan sa suspek.
Nagluntad ang komprontasyon sa tunga sang mga ini sa diin una nga naggabot sang dala nga sanduko ang suspek kag ginlabo ang biktima apang ini naman ang nakabalos paagi sa pagbuno.
Sa subong padayon nga ginabulong ang biktima nga si Martinez sa Roxas Memorial Provincial Hospital nga nag-angkon sang pilas sa tuo nga kamot kag dughan samtang gindangat man sa Health Centrum Hospital ang suspek nga si Geronimo bangud sa naangkon sini nga pilas sa nawala nga kamot.
