Davao City – Subling nagpahimangno si Davao City Mayor Sara Duterte-Carpio sa mga empleyado sa gobyerno nga nagapangolekta og kwarta bugti sa pagpabakuna batok Coronavirus Disease 2019 (COVID-19).
Matud ni Mayor Sara (sa interbyu sa city-owned radio) nga subay sa ilang gihimong inbestigasyon, nasayran nga anaa sa City Government of Davao ang tinubdan sa naasoy nga reklamo apan kini gilayong naaksyonan ug kini napaundang.
“Nabuhatan pud ‘to namo og investigation and we found out nga diri siya sa City Government side ang dunay problema and we reminded City Government employees nga bawal na sya nga mangayo ‘ta og kwarta sa mga tawo because that is graft and corruption and wala pud gyud ‘tay ingon ana nga policy nga kung magbakuna mangolekta ‘ta og pang-merienda, bawal na siya,” saysay sa mayor.
Gisaysay ni Duterte-Carpio nga posibleng walay kasayuran o kahibalo ang ubang trabahante sa lokal nga panggamhanan nga bawal gayud ang pagpangayo o pagdawat bisan og gamay nga kantidad sa kwarta.
Subling gipasabot sa opisyal nga walay bayad ug libre lamang gikan sa gobyerno ang pagpabakuna batok COVID-19.
RadyoMaN Kirby Manzon
