Davao City – Dili election-related incident ang kalit lang matud pa nga pagpanigbas sa usa ka lalaki human nga nangayo og tambag sa usa ka brgy. kagawad sa Brgy. Baculin, Baganga, Davao Oriental bandang alas 8 kagabii.
Sa pakighinabi sa DXDC RMN Davao kang PO2 Luisito Ronquillo Jr. sa Baganga Municipal Police Station ug imbestigador sa maong insidente, sumala niya nga igo lang naghinabiay ang suspek nga giilang si Diego Crabahal, 47 anyos ug Brgy. Kagawad Eusebio Sayman sulod sa balay sa maong opisyal apan kalit lang mikuha og lagaraw ug nanigbas ang suspek nga miresulta sa pagkasamaran sa lima ka mga tawo.
“Naay reklamo sa iyaha sa Brgy. kay gihagbas daw ang mga saging, giingnan nga walay grado pero na-settle naman to sa purok daw, giluom niya hangtod nga nagpatabang ug nangayo siya og tambag sa kagawad apan kalit lang nanigbas sa kusina,” sigun sa imbestigador.
Apan napusilan-patay ang suspek human nga nanigbas og mga sundalo nga miresponde sa maong insidente samtang ang lima ka samaran daling gidala sa balay-tambalanan ug anaa na sa luwas nga sitwasyon.
Dugang niini, sa pakighinabi usab kang Rolando Gambong, Brgy. Kagawad sa committee on peace and order sa maong Brgy., gisaysay niini nga walay bangi tali sa suspek ug sa pamilya ni Kagawad Sayman ug nasayran nga adunay problema sa panghuna-huna ang suspek.
RadyoMaN Renz Barbarona
