Hinamon ng Civil Service Commission (CSC) ang mga lingkod-bayan na gawing moral na obligasyon na iangat ang buhay ng mga mahihirap sa pagsalubong sa Bagong Taon.
Kinilala ni CSC Chairperson Karlo Nograles ang mga opisyal at empleyado ng gobyerno sa kanilang dedikasyon sa paglilingkod nang may integridad sa kabila ng kahirapan.
Aniya, nalampasan ng mga manggagawa mula sa iba’t ibang larangan ang bawat krisis na may matatag at matibay na diwa na tumutukoy sa mga Pilipino.
Hinikayat din ni Chairperson Nograles ang 1.9 milyong lingkod-bayan sa buong bansa na yakapin ang diwa ng Pasko at salubungin ang nalalapit na Bagong Taon hindi lamang sa pamamagitan ng maligayang pagtitipon kundi sa pagtatrabaho nang may kahusayan, integridad, at pagmamahal sa bansa.
