Sa interbyu sa RMN Davao kang Police Major Jonnel Bonguyan, Eden Police Station Commander, gihulat pa nila ang amahan kinsa complainant sa kasong Homicide with Rape.
Natanggong sa Kuwait ug wala pa makauli sa Pilipinas ang inahang OFW.
Matud ni Brgy. Sibulan Kapitan Christine Rose Abalayan, nagkaproblema pa ang visa sa pagbyahe sa inahan nga manukad gikan og nasud Kuwait padulong India, India pa-Singapore ug Singapore pa Pilipinas.
Nangayo og tabang ang inahan nga makauli gilayon kini karong semanaha human mahitabo ang trahedya sa ilahang pamilya.
Ika-siyam na nga adlaw karon sa haya sa biktima human kini napalgang patay sa creek nga bali ang parte sa lawas, adunay mga samad ug mga bun-og sa kalawasan niadtong Disyembre 4, 2022 Dominggo.
Kumpirmado usab nga gilugos ug giabuso ang biktima subay sa autopsy result.
Hustisya ang padayong singgit sa kabanay tungod nagpabiling gawasnon pa ang suspetsado sa mangilngig nga krimen.
RadyoMaN Aimee Guinita
