Davao City – Gimandoan sa Regional Internal Affairs Service (RIAS-XI) ang Davao City Internal Affairs Service nga imbestigahan ang kalambigitan sa duha ka pulis sa pagpangabuso sa mga curfew violators sa Barangay San Antonio, Agdao, syudad sa Davao.
Sa pakighinabi sa DXDC RMN Davao kang RIAS-XI spokesperson Police Capt. Cecilia Falguera, nasubo sila sa maong insidente kinsa matud pa pulis ang alegasyong nagpasalom sa kanal isip silot sa mga nakalapas sa gipatumang curfew hour.
“Maghimo mi og parallel investigation kung unsa ang tinuod, di man pud pwede nga iduot ang pulis kay wala pay reports, wala pay mianhi nga complainants. Wala nalipay ang PNP ani, nasubo mi nga dunay ani nga panghitabo,” segun ni Falguera.
Daghang kasong administratibo ang posibleng atubangon sa mga pulis nga naduhig sa pagpasalom sa mga violators sa curfew sa kanal.
“Daghan sya’g pwedi nga masudlang kaso sa administratio tungod kay ang ilahang gihimo usa kini ka grave offense. Pwede nato siyang isulod sa misconduct, meaning mali ang ilahang gibuhat, makauulaw ang ilahang gibuhat ngadto sa organization, sa katawhan. Pwede ibutang sa conduct unbecoming of a police officer. Incompetence kay murag wa kahibalo sa buhaton nganong gipasalom man nga allegedly nag violate sa ordinances. Pwede oppression kay human rights violation,” dugang sa tigpamaba.
Sumala kang Falguera, maximum dismissal from the service ang posibleng silot sa mga grave offenses ug 90 ka adlaw ang pagresolba sa mga kasong administratibo sa mga police.
Panawagan sa RIAS-XI sa mga complainants nga dili mag-atras abante ug i-duso gayod ang ilang mga reklamo.
RadyoMaN Aimee Guinita
