Davao City – Mutabang ang lokal nga gobyerno sa syudad sa Davao sa pagpasang-at og mga kaso batok sa usa ka top leader sa New Peoples Army kun NPA nga nadakpan sa Bukidnon.
Sumala ni Davao City Mayor Inday Sara Duterte-Carpio nga pinaagi sa pagpasang-at og kaso sa City Prosecutor’s Office batok kang Elizalde Cañete alias Ka Jinggoy, mahatagan og hustisya ang mga biktima sa gihimo sa mga NPA sama nalang sa pagkamatay sa usa ka fish vendor nga si Larry Buenafe nga naigo sa mibutong landmine sa may dalan sa Mandug niadtong Mayo sa miaging tuig.
Dugang sa alkalde nga mahinungdanon ang pag aresto kang Ka Jinggoy sa pagkab-ot sa hustisya alang sa mga biktima sa hinimuan sa pikas pundok.
Subay niini, gikalipay sa Mayor ug gidayeg ang kasundaluhan sa pagdakop sa maong lider ug nanawagan ngadto sa katawhan nga suportahan ang lokal nga gobyerno sa syudad, kasundaluhan, kapulisan ug mga brgy. aron hingpit ng makab-ot ang ginatinguhang kalinaw sa syudad.
RadyoMaN Renz Barbarona
