Davao City – Hugot nga gikondena sa Barangay Baganihan sa Marilog ang pagpusil-patay kang Kagawad Joel Siawan ug Indigenous People Mandatory Representative (IPMR) Datu Ernesto Matalam sa Sitio Bagong Silang, Barangay Baganihan, Marilog District, Davao City niadtong Sabado, July 1, 2023.
Sa Facebook post sa Barangay Baganihan Council, hustisya ang ilang panawagan sa brutal nga pagpatay sa mga biktima.
“Among kasakit og kasubo sa pagpatay sa atong halangdon nga Kagawad Joel Siawan ug IPMR Datu Ernesto Matalam. Gikondena nato ang brutal nga pagpatay kanila. Hustisya ang gipangita sa ilang kamatayon,” tipik sa pamahayag.
Sa inisyal nga report, nagpahigayon og tribal ritual sa usa ka lote sa lugar si Kagawad Siawan ug Datu Matalam uban ang laing pang indibidwal, sa dihang kalit lamang silang gipusil sa wala mailhing suspek nga daling miikyas human sa insidente.
Naglusad karon og hot pursuit operation ang kapulisan aron madakpan ug mapanubag ang responsable sa maong krimen.
RadyoMaN Kirby Manzon
Facebook Comments
