General Santos City–Nagpadayon ang gihimong imbistigasyon sa Police Station 4 kalabutan sa pagpamusil sa wala pa mailhing suspek ngadto sa biktimang si Kim Dexter Sevilla, usa ka negusyante ug residente sa Countryside Subdivision, barangay San Isidro, Gensan kansa gipusil patay alas 8:00 pasado sa buntag atubangan mismo sa ilang panimalay niadtong adlawng Martes.
Matud ni Police Major Alex, Lanestosa, Hepe sa San isidro PNP nga sa karon ila pang ginaila ang suspetsado sa krimen.
Personal grudge ang usa sa mga gitudlo nilang hinungdan sa pagpatay sa nasampit nga biktima. Gikumperma usab ni Lanestosa nga aduna na silay person of interest nga ginasundan kalabutan sa pagpatay sa biktima.
Samtang iyang gibutyag nga walay kalabutan sa negusyo ang pagpatay sa nasampit. Gikumperma usab niini nga walay criminal record ang nasampit nga negusyante ngadto sa ilang buhatan.
Sa kasamtangan ginasubay pa sa kapulisan ang tanang CCTV camera nga nakainstall duol sa nahitabuan sa krimen.
Tumong niini aron sutaon kung nakuhaan ug CCTV Footage ang nahitabong pagpatay.
Nasayran nga basi sa inisyal nga imbistigasyon sa kapulisan ang mga suspek nga mipatay sa nasampit ang nakatabon ang nawong ug naka Jacket nga adunay hood.
