Gibalik na sugod Agosto 11 ang pagpatuman sa home quarantine pass sa Marawi City, isip usa sa mga lakang aron mapugngan ang pagkuyanap sa coronavirus sa siyudad.
Sa executive order number 2020-041, usa ka quarantine pass lamang matag pamilya ang gitugot ug gamiton lamang kini sa head of the household kung mogawas aron mamalit sa mga importanteng panginahanglanon sa pamilya sama sa pagkaon ug tambal.
Apan transferrable ang maong quarantine pass ngadto sa laing membro sa pamilya nga maoy ipagawas aron mamalit sa panginahanglanon sa pamilya.
Kung walay importante nga transaksiyon sa gawas, mopondo lang sa balay.
Sa maong executive order, gipasuspende sulod sa 14 ka adlaw, sugod niadtong Agosto 11, ang operasyon sa mga function halls sama sa kasal, kanduri o thanksgiving, seminar o ubang matang sa panagtapok nga adunay daghang partisipante.
Human sa 14 ka adlaw, ang tagdumala sa maong function hall kinahanglang mopasa og operational plans ngadto sa City Treasurer’s Office, diin nakabutang ang “action of compliance” sa minimum health protocols atol unya sa ilang pagbalik sa operasyon.
Ang mga empleyado sa mga establisimento nga gitugutang magpadayon sa pagbukas ug operasyon, lakip na niadtong gitawag og APOR o authorized person outside of residence sama sa mga medical health personnel ug mga non-medical frontliners, mahimong dili mogamit og quarantine pass apan kinahanglang mopakita sa ilang employment ID o kaha certificate of employment.
Gibalik ang maong istrikto nga movement sa publiko tungod sa padayon nga pagtaas sa local transmission sa Marawi City ug sa Lanao del Sur
