Labason, ZDN- Personal nga bangi karon ang gituohan nga hinungdan sa pagpusil patay kang Rey Vallecer Josue kanhi opisyal sa barangay La Union lungsod sa Labason ZDN.
Nahitabo kini sa miaging gabie didto mismo sa ilang pinuy-anan sa nahisgutan nga barangay.
Sa pag imbistiga sa kapulisan sa Labason, kining biktima nga si Rey uban ang iyang igsuon nga si Edwin anaa kini sila naglingkod sa ilang payag-payag sa ilang tugkaran.
Matod pa kalit lang adunay miabot nga estranghero ug nangutana kun anaa ba ang asawa niini nga si Analiza Josue, kasamtangan ABC president sa Labason.
Sa dihang gi ablihan sa biktima para pasudlon, kalit lang nga gitutukan siya hinungdan nga misulay pa kini ug dagan palayo apan gisundan kini sa duha ka mga kriminal ug gipabuthan hinungdan nga nahagba kini ug didto na nakahigayon sa pagpusil sa ulo sa makaduha ka higayon.
Saysay sa mga residente sa palibot 4 ngadto sa 5 ka buto ang ilang nadungog gikan sa balay sa pamilyang Josue.
Alas 7:10PM gideklarang DOA sa balay tambalanan ang biktima.
Hustisya karon ang gisinggit sa pamilyang nagbangutan ug nanghinaot nga sa dili madugay madakpan ang mga kriminal.
