Suma kang KBP Davao City Chapter President Roy Geonson, ang pagpusil patay kang Juan Jumalon kon mas nailang Johnny Walker sa Radyo sa Calamba, Misamis Occidental, usa ka alaot nga kamatooran alang sa hut-ong sa mga media nga dinhi sa nasod pabilin giha- pong peligro ang trabaho sa media luyo sa mga balaud nga nagprotekta ug sa ka-moderno sa panahon karon.
Dako ang katahap ni Geonson nga hayan may kalabotan sa baguhay nga nahuman nga Barangay ug Sangguniang Kabataan Election (BSKE 2023) ang motibo sa pagpatay kang Jumalon kinsa gisulod sa wala mailhing suspek ang biktima samtang nagsibya 5:00 sa buntag gahapon adlawa diin ang maong krimen nakuha pa sa live program niini sa online.
Gihagit karon ni Geonson ang kapulisan sa Misamis Occidental nga tutukan og maayo ang imbistigasyon aron ma-establisar ang rason ug masikop ang mamumuno ug anaa sa likod sa pagpatay sa biktima.
Segun ni Geonson nga sagad sa gipamatay sa media sa nasod halos mga block-timer sa radyo, hinoon dinhi sa dakbayan sa Davao miagi sa saktong training sa ethics ug iksaminasyon sa pagka-magsisibya hinungdan nga minos ra ang pamatay sa mga media dinhi sa dakbayan sa Davao.
RadyoMaN Joel Viray
