Pagadian City – Padayon pang giimbestigahan sa kapulisan sa lungsod sa Tabina ang motibo sa pagpusil-patay sa usa ka empleyado sa LGU Tabina nga gipusil kaniadtong alas 2:30 sa hapon kaniadtong nakalabayng adlaw partikyular didto sa entrance gate sa Culabay Cockpit Arena nga nahimutang sa Purok Dap-dap, Brgy Culabay, Tabina, ning probinsya sa Zamboanga del Sur.
Giila ang biktima nga si Juan Monterola, 58 anyos ug residente sa Brgy Baganian, Tabina, Zamboanga del Sur kinsa nakaagom ug daghanang mga samad sa lawas human kini gipusil sa duha ka wala mailhing mga suspetsado samtang nagtindog ang biktima nga miresulta sa iyang hinanali nga kamatayon.
Daling nisibat ang mga suspek sakay sa usa ka wala matinong motorsiklo.
Nahipos sa dapit nahitabuan ang 14 ka mga basiyo sa bala sa Calibre 45.
Hustisya ang panawagan sa pamilya.
