Pagpusil-patay sa ex-mayor sa Cateel giimbestigahan, motibo padayong gisuta

Davao City – Padayong naglusad og imbestigasyon ang Bajada Police Station aron pagsuta sa motibo sa pagpusil patay sa kanhi mayor sa lungsod sa Cateel Davao Oriental nga giila nga si Giselo Velasco Castillones kauban ang iyang drayber nga samdan sab nga si Junie Castro og laing pang usa ka pasahero naila nga si Alama Lozentez 57 anyos, negosyante residente sa Barangay San Rafael, Cateel, Davao Oriental natigayon ang pagpamusil kaganinang alas 10:00 sa buntag Nobyembre 22, 2023 sa KM-5 Barangay Buhangin Davao City.

Sa pakighinabi sa DXDC RMN Davao kang PEMS Domenic Patajo, Investigator sa Bajada Police Station gisulti niya,naglusad na og mas lawom nga imbestigasyon sa pagpusil aron masuta ang motibo sa maong insidente.

Segun ni Patajo, subay sa inisyal nga imbestigasyon sakay sa iyang sakyanan ang mayor kauban ang drayber og laing pang kauban human nangaon og pamahaw sa usa ka fastfood restaurant sa Buhangin ug molakaw na unta sadihang kalit nga miduol sa sakyanan ang usa ka wa mailhing lalaking suspek dayon gipusil upat (4) kahigayon gamit ang . 45 kalibre nga pistola resulta sa kamatayon sa mayor samtang samdan ang drayber.

Human sa pagpamusil misakay dayon ang gunman sa naghuwat nga motorsiklo ug paspas nga mipaingon sa Buhangin area.

Ang patay’ng lawas sa Ex-Mayor nga si Castillones, gidala na sa Cosmopolitan sa Camus Brgy.9-A samtang ang drayber nga si Castro ang padayong gitambalan sa mga doktor sa Southern Philippine Medical Center (SPMC).

RadyoMaN Don Pulayao