Davao City – Nagapadayon karon ang gihimong imbestigasyon sa kapulisan labot sa pagpusil-patay sa usa ka magtutudlo sa Abad Santos Street, Prk 4, Brgy Cambanogoy, Asuncion, Davao del Norte alas 6:30 kagahapon sa buntag, November 12, 2019.
Sa interbyu sa DXDC RMN Davao kang Police Major, Jake Goles, hepe sa Asuncion PNP, giila niini ang biktima nga si Joan Laruya, kindergarten teacher sa Katipunan Elementary School sa Brgy. Doña Andrea, Asuncion, Davao del Norte.
Saysay ni Goles nga padulong sa trabaho ang maestra sakay sa tricycle diin samtang naghulat sa kauban, kalit na lamang sumala pang mi-overtake ang usa ka motor dayon gipusil sa wala pa mailhing suspek ang biktima.
“Pasulod siya sa iyang trabaho. Mura’g naghunong tong tricycle kay naay gihulat. Naay ni-overtake nga motor. Kalit lang nga naay nibaba nga tao gipusil dayon ang victim,” saysay ni Goles.
Dili pa usab masuta kung ma-link sa investment scheme ang insidente ug ginasayud pa usab kung adunay naka-away o naka-bangi ang biktima ayha nahitabo ang krimen.
RadyoMaN Kirby Manzon
