Pagpusil patay sa usa ka negosyante padayon pang giimbestigahan

48

Pagadian City – Padayon pa gihapon nga giimbestigahan sa kapulisan dinhi sa syudad sa Pagadian ang mga suspetsado nga responsable sa pagpusil patay sa usa ka negosyante kaniadtong Sabado sa udto sa Purok Alaska, Gatas, Pagadian City.
Giila ang biktima nga si Cezar Antoque Pintado, 35 anyos, minyo, usa ka negosyante ug residente sa lungsod sa Tukuran, ning probinsya sa Zamboanga Del Sur.
Sa imbestigasyon nasayran nga sa wala pa ang nahitabong pagpamusil, nakighinabi pa ang biktima ngadto sa duha niya ka mga kaubanan didto sa Balamban Liempo, nga nahimutang sa Gatas District, Pagadian City dihang sa kalit duha ka wala mailhing mga lalaki ang miduol kaniya ug namusil apan wala makaigo.
Nakadagan pa ang biktima paingon sa Embing Compound sa Datoc St. Gatas District, Pagadian City apan gisundan kini sa suspetsado ug gipusil sa makadaghang higayon hinungdan nga nahagba ang biktima sa yuta samtang ang suspek ang daling midagan, sibat sa dapit nahitabuan.
Duha ka samad pinusilan sa lawas ang naangkon sa biktima ug nahimong hinungdan sa iyang hinanali nga kamatayon.
Padayon pang gisuta sa kapulisan ning syudad ang motibo ug ang pagpahigayon sa makuting imbestigasyon arun maila ug madakpan ang mga responsable sa pagpamusil patay.

Facebook Comments