Hiniling ni Senator Lito Lapid ang agad na pagsasabatas ng panukalang batas na magtatatag ng kauna-unahang Virology Institute of the Philippines.
Naunang naaprubahan sa ikatlo at huling pagbasa ng Senado ang iniakda niyang Senate Bill 2893 na layong palakasin ang virology research sa bansa, partikular sa mga sakit na nakakaapekto sa tao, hayop, at halaman.
Iginiit ni Lapid ang kahalagahan ng virology studies o ang pag-aaral sa lahat ng uri ng viruses at viral diseases na maaaring maging banta laban sa kalusugan ng taumbayan.
Kapag tuluyang naisabatas ay palalakasin nito ang pag-develop ng bakuna laban sa mga banta ng pathogens.
Batay sa panukala, hinihikayat ang Research Institute for Tropical Medicine (RITM) at iba pang research bodies na pabilisin at palakasin ang siyentipikong pag-aaral laban sa lahat ng virus sa Pilipinas.
Matatandaang nagkaroon ng mga panawagan ukol dito noong nahihirapan ang Pilipinas sa pagtugon laban sa COVID-19 pandemic.
