Pagadian City – Nagmalampuson ang pagsaulog sa ika-77 nga kasumaran sa Araw ng Kagitingan kagahapong adlawa sa Veterans Memorial Shrine, ning syudad sa Pagadian. Ang kasaulogan nagdala sa tema nga “Pamanang Kalayaan ng mga Beterano; Isabuhay at Pagyamanin ng lahing Pilipino.
Gitambungan kini sa 1st Infantry (TABAK) Division kauban sa mga personahe sa pangagamhanang local ning syudad sa Pagadian. Lakip usab sa mitambong ang nagkadiyang stakeholders sama sa Knights of Columbus, mga Senior Citizen, Veterans Federation of the Philippines, Mason, Illana Bay Lodge, Order of DeMolay, Recon Lakandula Rotary Club, Order of Amaranth, Fraternal Order of Eagles, BFP, PNP, DEPED ug ang DILG.
Ang nasangpit nga okasyon usa ka tinuig nga kalihukan nga naninguha sa pagpakita kung gi-unsa sa mga Pilipinong sundalo ang pakigbatok sa mga Hapon sa tuig 1942 atol sa World War II nga nagbilin og marka sa atong kasaysayan kung unsa kamatinguhaon ang mga Filipino Fighters.
Si Claudio F. Porio, ang District President sa1st Zamboanga del Sur Veterans, namahayag nga ang Araw ng Kagitingan usa ka importanteng panghitabo sa matag usa gumikan kay nagpahinumdom kini sa katungdanan sa matag usa nga mosukol ug dili magpaulipon sa mga malimbungong indibidwal arun magpabiling gawasnon ang nasud Pilipinas. Giila usab niya ang nabuhat sa mga bayani.
Si Brig. Gen. Jacinto Bareng, ang Assistant Division Commander for Operation mipahinumdom sa pagkamaisugon sa mga bayani.
Dugang pa niya responsibilidad sa matag usa ang pagmintinar sa kalinaw, dili alang sa mga nabiktima kaniadto kondili alang sa kasamtangan ug umaabot nga panahon alang sa tanan.
Photo Credit to PIA Pagadian
