Pagadian City – Epektibo na sugod karong adlawa ang City Resolution No. 2020-0599 nga temporaryong pagsuspendi sa paggamit ug helmet sa mga driver sa mga single nga motor.
Kini ang nahimong lakang sa syudad gumikan sa nahitabong sunud-sunod nga pagpanulis ug pagpamusil patay sa mga mamumuno nga maggamit ug full-face helmet ug bonnet atol sa pagbuhat sa krimen.
Gawas sa helmet, gidili na usab ang pagsuot ug face mask sama sa seamless face mask, colored bandanas ug ice silk thin sunscreen face mask. Ilalom gihapon sa maong resolution mao ang pagdili sa pagsuot ug tinted face shield, bonnet, kalo, visor, sunglasses, eye protection shield ug colored eye googles sa syudad lakip na sa giilang urban barangays.
Ang bugtong gitugot lamang nga suoton alang sa nawong arun sa paglikay nga mataptan sa sakit nga COVID-19 mao ang surgical face mask, KN95, cloth mask ug susama niini nga dili makatabon sa halos tiboook nga nawong.
Tumong niinin kamanduan nga tin-aw nga makit-an ang nawong sa driver lakip na sa pasahero arun kon ugaling adunay kriminalidad sayon alang sa kapulisan ang pag-ila sa mga suspetsado.
Sikopon usab ang motoristang molapas sa speed limit nga 30km per hour.
Una na nga namahayag si PLt Col Alvin Saguban, ang hepe sa kapulisan ning syudad nga ang pagpakusog sa pagpagdagan sa single nga mga motor maoy usa sa mga hinungdan sa disgrasya sa kadalanan.
