Pagtanggal sa classroom decors, giklaro sa DepEd-XI

Gihatagan og katin-awan sa Department of Education (DepEd)-XI ang direktiba sa departamento kalabot sa pagtanggal sa mga dekorasyon sa classroom subay sa DepEd Order No. 21 Series of 2023.

Sa pakighinabi sa DXDC RMN Davao kang Jenielito Atillo, tigpamaba sa DepEd-XI, iyang gipasabot nga dili kinahanglan nga tanggalon ang tanang butang nga nakapilit sa bongbong, kundili tanggalon lamang kadtong mga dili na importante nga dekorasyon sama sa listahan sa birthday sa estudyante, cleaners of the day ug uban pa.

Apan kung importante, sama sa alphabet, picture sa presidente, bayani ug uban pa, walay problema matud sa DepEd-XI official.

“Kung duna ‘tay mga unnecessary, naa pud ‘tay mga necessary. Dili ingon nga imuha na gyong totally tanggalan og mga nakaplastar nga mga paraphernalia ang usa ka classroom,” matud ni Atillo.

Una na niini, miani og managlahing reaksyon ang maong direktiba sa DepEd ilabi na nga adunay ginatawag nga visual learners. Apan subling gitataw sa DepEd-XI spokesperson nga na-misinterpret lamang kini sa ubang mga magtutudlo.

RadyoMaN Kirby Manzon