Davao City – Adunay nakitang basehan si Ateneo De Davao University (ADDU) Law school professor Atty. Arnold Abejaron sa pagtanggal ni Mayor Inday Sarah Duterte-Carpio sa tulo ka empleyado nga nagpositibo sa random drug test di pa lamang dugay.
Ang pagbisyo sa droga desisyon sa matag usa nga gapangita og temporaryo nga kalipay apan ang likod diay niini mao ang kalaotan ug miserable nga kinabuhi.
Magsilbi na unta nga mensahe sa ubang empleyado sa City Hall ang pagtaktak sa tulo ka empleyado nga malagmit magsugod na og sipa og lata sa ilang kaugalingon nga maglikay sa paggamit og droga.
Walay lalis nga ang lakang sa mayor nagpakita sa seryoso nga kampanya batok droga ug silhigon ang mga sagbot nga angay silhigon dili lang sa gawas apan bisan pa sa kaugalingon nga tugkaran.
Ang pagtanggal sa tulo ka empleyado sa City Hall nahisubay kini sa Civil Service Commission Order kung asa ang mga trabahante sa lokal o nasyunal nga buhatan nga mugamit og droga tatakon sa serbisyo.
Adunay mando ang Department of Labor and Employment (DOLE), Department of Education (DEPED) ug Commission on Higher Education (CHED) sa mga kompanya ug mga tulunghaan nga maglusad og random drug test diin ang magpositibo i-rehab sa ingon matabangan ang mga empleyado ug mga estudyante nga mag-usab sa kinabuhi, dili pareho sa gobyerno nga taktakon sa trabaho.
RadyoMaN Joel Viray
